الحرامية كتير

الحرامية أنواع كتير حرامية  فلوس وشغل و في حرامية وقت ومجهود و في حرامية مشاعر و طاقة و في حرامية عمر بحاله . الحرامية دول أحيانا كتير مش بيكونوا قاصدين يسرقونا لكن احنا اللي بنعطيهم فرصة لسرقتنا.

لما بنختار انهم يفضلوا في حياتنا لمجرد اننا بنحبهم بزيادة أو مصلحتنا في وجودهم معانا أو لأنهم عشرة سنين أو لأنه أبو الأولاد أو لانها أم العيال أو اننا ما تخيلناش حياتنا من غيرهم هتكون ازاي .

 مع العلم ان الحرامية دول ممكن يكون لهم حياتهم الخاصة و اللي احتمال كبير حضرتك ما تكونش من ضمن  الأولويات المهمة في حياة البني ادميين دول  و لكنك مصدر من  مصادر اللي بتخلي الناس دي تفضل عايشة و مكملة حياتهم. وده طبعا ما بيحصلش إلا لما حضرتك بتبقى مِسلم نفسك  لهم تسليم أهالي  و ده يرجع ان غالبا مكانتهم عندك كبيرة .فوقت ما يطلبك يلاقيك ووقت ما يحزن ايديك أول ايد تتمدله ووقت ما يحتاج فلوس بيحط ايده في جبيك عشان عارف انك هتنقذه حتى لو عارف ان انت فعلا مش معاك و  انك أصلا محتاج.

الزوج اللي مش طايق مراته بيفضل معاها بالسنين عشان خاطر الأولاد  و الزوجة اللي بتتحمل غباءات و خيانات زوجها على البرستيج قدام الناس و الشكل الاجتماعي و طبعا عشان خاطر الأولاد بتسكت و تكمل الحياة .. و دول أنا بعتبرهم أكبر حرامية في الدنيا كلها لانهم مش بس بيسرقوا أعمار بعض لا و كمان راحة بال اولادهم . يعني مش معنى انك اختارت غلط في البداية انك تفضل مكمل لانك بكده بتكون بتسرق أعمار عيالك و بتسرق الفرحة من عينهم و بتربي عقد و كلاكيع بتطلع في خلق بني ادمين تانين . مع ان لو كنت انفصلت بالحسنى كنت اشتريت عمرك و سعادة اولادك لكن احنا بنخاف من التغيير.

 في يوم  من الأيام هتصحى من النوم و انت كاره كل الدنيا و انت عندك ستين سنة و حاسس انك ما عشتش حياتك و شبابك ضاع على اللا شئ ، في نفس الوقت اللي زوجتك هتكون شايفة انك كمان حرمتها من كل المشاعر اللي كان نفسها تعيشها معاك . و هتلاقوا فجأة أولادكم مش حواليكم و كل واحد شاف حياته ومش مهتمين بيكم أصلا . عارفين ليه؟!

لانكم ببساطة لم تبروا أنفسكم كي يبروكم. ازاي هيخاوفوا عليكم و انتم اصلا استخسرتوا  كده في نفسكم و اتهربتوا من الاهتمام بنفسكم لقلقكم و خوفكم الزايد على عيالكم . بطلوا سرقة بقى

ده غير مديرك في الشغل اللي عاوزك تعمل اي حاجة و كل حاجة و لما تجي مصيبة يلبسهالك .. و حبيبك المتخلف  اللي ما بيعرفش يحب اصلا و اللي حضرتك فاتح له طاقات قلبك ودماغك يشحن منها طول الوقت و انت عمال تنتهي ببطئ . أقاربك و أصحابك الحلوين اللي يبستهلكوا روحك في حل مشاكلهم  ده غير أصحابك اللوامين اللي كل ما يشفوك يقولوا لك انت السبب في كل مصيبة حصلتلهم في حياتهم و يشيلوك الهم و يحسسوك دايما بالتقصير و انت مش عارف ليه .

و طبعا أولادك المقرفين اللي انت سايب نفسك  و جيبك لهم من غير ما يحسوا بتعبك و لا يقدروا مجهودك عشان راحتهم .

كل الناس  دي كان ممكن مايكونوش حرامية لو احنا بس عرفنا ازاي نقَدر نفسنا من غير مبالغة و لا تصنع.. لما نعرف امتى نعطي و امتى ناخد و امتى نمنع و نقرب ,, وامتى نخرج الناس دي من حياتنا للابد.. الاختيار دايما لنا بس احنا اللي بنخاف نختار لكن لو جربنا حياتنا من غير حرامية الحياة دول.... و بعض الشجن اللي هيكون جوانا بسبب خسارة الحرامية دول هيبقى مصدر كبير جدا لنجاحنا و تفوقنا و ابداعتنا في نواحي الحياة ...قليل من الشجن يضفي على حياتنا و عيوننا رونق و جاذبية جميلة.